Më datë 8 maj 2026, përfaqësues të Bashkisë Himarë morën pjesë në aktivitetin zyrtar të lançimit të programit “EU4Municipalities – Faza II”, zhvilluar në Durrës, me praninë e Kryeministrit të Shqipërisë Edi Rama, përfaqësuesve të Delegacionit të Bashkimit Europian në Shqipëri, Ambasadës Gjermane, GIZ, ministrive përkatëse, si dhe kryetarëve dhe përfaqësuesve të bashkive nga i gjithë vendi.

Ky aktivitet shënoi nisjen zyrtare të fazës së dytë të programit EU4Municipalities, një iniciativë që synon forcimin e zhvillimit vendor, përmirësimin e ofrimit të shërbimeve publike dhe rritjen e bashkëpunimit ndërmjet institucioneve vendore dhe partnerëve ndërkombëtarë.

Gjatë takimit u diskutua mbi rëndësinë e fuqizimit të bashkive, sfidat e zhvillimit lokal dhe roli i partneriteteve europiane në mbështetje të reformave dhe zhvillimit të qëndrueshëm në nivel vendor. Pjesëmarrja e Bashkisë Himarë në këtë aktivitet përfaqëson angazhimin e vazhdueshëm të institucionit për të qenë pjesë aktive e programeve dhe iniciativave që kontribuojnë në zhvillimin e komunitetit dhe forcimin e bashkëpunimit me partnerët europianë dhe ndërkombëtarë.

Sot patëm kënaqësinë të mirëprisnim në një takim zyrtar Ambasadorin e Republikës Çeke në Shqipëri, Shkëlqesinë e Tij z. Pavel Vacek, të shoqëruar nga zv. Ambasadorja znj. Irena Žišková dhe Konsullja e Nderit znj. Lolita Poda.

Gjatë këtij takimi u diskutuan mundësi mbi bashkëpunimin dypalësh, me fokus të veçantë në aktivitete e projekte të përbashkëta si dhe rritjen e numrit të vizitorëve çekë në Himarë.

Gjithashtu u diskutua procesi i integrimit evropian për Shqipërinë dhe mundësitë për partneritete e binjakëzime të Bashkisë Himarë me bashki në Republikën Çeke.

Vazhdojmë të ndërtojmë ura bashkëpunimi që i shërbejnë zhvillimit të komunitetit tonë!

Në vijim të procesit të integrimit evropian, njësia e Integrimit Evropian në Drejtorinë e Integrimit Evropian dhe Projekteve me Donatorët, morën pjesë në aktivitetin e organizuar nga Agjencia për Mbështetjen e Vetëqeverisjes Vendore (AMVV), në bashkëpunim me Projektin EU4GoodGovernance (BE për Qeverisjen e Mirë).

​Në këtë takim, ku ishin të pranishme 15 bashki të qarkut Vlorë dhe Gjirokastër, fokusi kryesor ishte:
* ​Udhërrëfyesi për Dialog​
* Konsultimet
* ​Koordinimi me Partnerët

Ky bashkëpunim na ndihmon të qartësojmë detyrimet dhe hapat konkretë që duhen ndjekur në rrugëtimin drejt standardeve europiane.

Bashkia Himarë mori pjesë në vizitën studimore të zhvilluar në Vjenë, në kuadër të projektit evropian URBACT “Nxitës Pionier (Pioneer Accelerator)”, në të cilin bashkia është partnere.

Gjatë kësaj vizite, përfaqësues nga vendet e Ballkanit Perëndimor patën mundësinë të njihen me praktikat më të mira evropiane në fushën e mobilitetit të qëndrueshëm dhe përfshirjes së aktorëve lokalë në planifikimin e transportit urban.

Programi përfshiu takime me institucione dhe operatorë kryesorë të transportit, si Wiener Linien, Mobility Agency Vienna dhe NextBike, si dhe shembuj konkretë në terren, përfshirë infrastrukturën e biçikletave, zonat me kufizim shpejtësie 30 km/h dhe nyjet intermodale në stacionet kryesore të Vjenës.

Vizita studimore vijoi edhe në Sankt Pölten, ku u prezantua modeli i menaxhimit rajonal të transportit nga NÖVOG, si dhe në Zlín, ku u njoh një model i integrimit të transportit publik, i mbështetur nga aplikacioni digjital FAIRTIQ.

Njohuritë dhe përvojat e përfituara nga ky shkëmbim do të shërbejnë për zbatimin më efikas të projektit dhe për zhvillimin e zgjidhjeve të përshtatshme të lëvizshmërisë urbane për Bashkinë Himarë, në përputhje me standardet e Bashkimit Evropian.

Në Bashkinë Himarë u zhvillua takimi Action Lab 3 ne kuadër të programit URBACT, i fokusuar në përmirësimin e mobilitetit urban dhe transportit.

​Gjatë takimit u përmblodhën dhe u konkretizuan diskutimet e zhvilluara në takimet e mëparshme, duke u dakordësuar mbi disa drejtime kryesore prioritare për vijimin e projektit.

​Si rezultat, u identifikuan dy drejtime kryesore veprimi: përgatitja e një studimi paraprak për organizimin e ardhshëm të transportit publik urban në Himarë dhe përmirësimi i informacionit digjital mbi mobilitetin, me qëllim rritjen e aksesit dhe qartësisë së informacionit për qytetarët dhe vizitorët.

​Këto hapa përfaqësojnë një bazë të rëndësishme për planifikimin e ardhshëm të mobilitetit dhe për vendimmarrje më të mirëstrukturuara në nivel bashkiak.

 Takimi i dytë me përfaqësues nga sektori publik dhe privat, në kuadër të projektit “Nxitës Pionier (Pioneer Accelerator)”.

​Diskutimet u përqendruan në ide konkrete që lidhen me nevojat aktuale të lëvizshmërisë në Bashkinë Himarë. Palët mbështetën plotësisht nismën për hartimin e një Plani të Integruar të Lëvizshmërisë Urbane për gjithë territorin, si një hap thelbësor i projektit.

​U theksua gjithashtu rëndësia e përdorimit të një platforme digjitale përmes Google Maps, si një mjet inovativ orientimi për mënyrat e lëvizjes në Himarë.
​Këto propozime do të shërbejnë si pika kyçe për fazën e pilotimit të projektit, e parashikuar të nisë në pranverë–verë 2026.